قصيدتان

المصرى اليوم 0 تعليق ارسل لصديق نسخة للطباعة تبليغ

اشترك لتصلك أهم الأخبار

نَدَم

كبرت بناتنا فى بلاد الغربة

واحنا فقارى هنا، فقارى هناك

احنا اللى عدينا البحور وياك

واما طلعت الجبل

قعدنا نستناك

الريح بتقلب قُدُورنا، وبتنطفى نارنا

والضبع لابِدْ جارنا

هنا لنا الليل الطويل.. والويل

وهناك ما عادش هناك.

■ ■ ■

موت موظف

يمكن يكون دا آخر اعتراف:

وحدى أنا المسؤول

دخلت من باب الخروج

وخرجت من باب الدخول

قول اللى عايز تقوله لو ضرورى تقول!

أنا باعترف لو كان يفيد الاعتراف:

ما قدرتش امضى حضور

ونفسى أمضى انصراف

أسيب يادوبك شخبطة ف الدفتر

وموش ضرورى الاسم، والعنوان، والأوصاف

أسيب يادوبك علامة

زى اللى سابها ضلى ع الحيطة

فى آخر الليل الطويل

زى اللى باقى من قميص الصبى .. على حبال الغسيل

زى اللى باقى من رفاق العمر

على حبال المشانق

مشانق الثرثرة والوهم والتأجيل.

انت الان تتصفح خبر بعنوان قصيدتان ونحن فى بوابة أخبار مصر لا نتحمل أى مسؤولية تجاه هذا الخبر ويمكن الرجوع الى المصدر الاصلي للخبر من هنا المصرى اليوم

إخترنا لك

أخبار ذات صلة

0 تعليق