«المصري كيدز».. حدوتة جني وريتاج

المصرى اليوم 0 تعليق ارسل لصديق نسخة للطباعة تبليغ

جنى بتحب القصص والحواديت وقررت تكتب حدوتة كبيرة وجميلة للأطفال عن الأحلام وقعدت هى وريتاج أختها يفكروا ويدوروا عن فكرة الحدوتة.. وبما إنهم هم الاتنين بطلات فى كرة السلة وكرة اليد وبيحبوا الرياضة فقرروا يكتبوا حدوتة عن رحلة بنوتة صغيرة للبطولة.. ولأنهم شاطرين وعارفين إن أهم حاجة فى البطل الرياضى هو النظام، فكتبوا حدوتة عن بنت اسمها سمر.. سمر قررت تبقى بطلة فى الجمباز وماما وبابا حاولوا يساعدوها بس سمر كان عندها مشكلة صغيرة.. كانت بتتعب فى التمرين وماتقدرش تكمل.. وفى يوم، سمر تعبت أوى، وبابا وماما خدوها وراحو للدكتورة.. وطبعاً سمر كانت قلقانة وبتعيط عشان ممكن الدكتورة تكتبلها حقنة بس أول ما الدكتورة شافتها قعدت تضحك معاها لحد ما سمر اتطمنت.. والدكتورة لما سألتها عن نظام الأكل بتاعها سمر ماعرفتش ترد.. فماما قالت للدكتورة إن سمر مش بتاكل كويس.. وإنها بتاكل شيكولاته وحلويات كتير.

الدكتورة بصت لسمر وقالتلها يا سمر يا حبيبتى إنتى كده شكلك مش عاوزة تبقى بطلة فى الجمباز.. سمر قالتلها وهى خايفة: ليه يا دكتورة دا أنا بحب الجمباز أوى.. فالدكتورة قالتلها إن جسم الإنسان لازم يتبنى بشكل سليم وإنها عشان تبقى بطلة وتحقق كل أحلامها لازم تعمل نظام للأكل وتلتزم بيه.. ولو ما التزمتيش بيه يبقى ماينفعش تروح التمرين.. وشرحتلها إنها لازم تحافظ على كل العناصر الغذائية.. يعنى لازم جسمها يوصله بروتينات وألبان وخضراوات وفاكهة ونشويات.. ولو فيه حاجة نقصت من العناصر دى فجسمها هيتعب بسرعة ومش هتقدر تكمل التمرين ولا هتقدر تبقى بطلة وكمان لازم الشيكولاتة والحلويات يبقوا أقل بكتير من الأول.. وماينفعش ناكلهم بدل العناصر الغذائية الأساسية المفيدة.

سمر فكرت شوية وقررت إنها لازم تكمل حلمها وتبقى بطلة وطلبت من ماما إن الأكل بتاعها كل يوم لازم يبقى فيه كل العناصر دى. ولما جنى وريتاج كتبوا الحدوتة، والمدربين بتوعهم قروها فرحوا بيها جدا.. وقرروا يحكوا قصة سمر لكل الأطفال اللى بيحلموا يبقوا أبطال.

انت الان تتصفح خبر بعنوان «المصري كيدز».. حدوتة جني وريتاج ونحن فى بوابة أخبار مصر لا نتحمل أى مسؤولية تجاه هذا الخبر ويمكن الرجوع الى المصدر الاصلي للخبر من هنا المصرى اليوم

أخبار ذات صلة

0 تعليق